ट्रम्पको हस्तक्षेपपछि पनि दक्षिण लेबनानमा इजरायली ड्रोन आक्रमण, ८ जनाको मृत्यु
दक्षिण लेबनानमा इजरायलले मंगलबार गरेको ड्रोन आक्रमणमा आठ जनाको ज्यान गएको छ। मृतकमध्ये एउटै परिवारका बाबु, छोरा र छोरी पनि रहेका छन्।
यसअघि सोमबार इजरायलले बेरुतको दक्षिणी क्षेत्रमा सैन्य कारबाही गर्ने चेतावनी दिएको थियो। अमेरिकी राष्ट्रपति Donald Trump ले भने इजरायली प्रधानमन्त्री Benjamin Netanyahu सँग टेलिफोन वार्ता गर्दै आक्रमण रोक्न आग्रह गरेका थिए। त्यसलगत्तै ट्रम्पले सामाजिक सञ्जालमार्फत बेरुतमाथि आक्रमण नहुने बताएका थिए।
ट्रम्पले आफ्नो सामाजिक सञ्जाल पोस्टमा नेतान्याहूसँग सकारात्मक र परिणाममुखी कुराकानी भएको उल्लेख गर्दै बेरुततर्फ अघि बढिरहेका सैनिकहरू फिर्ता हुन थालेको दाबी गरेका थिए।
यसबीच ट्रम्पले मध्यस्थकर्तामार्फत Hezbollah सँग पनि अप्रत्यक्ष संवाद गरेका थिए। नेतान्याहुले ट्रम्पसँग यस विषयमा छलफल भएको पुष्टि गरे पनि हिजबुल्लाहले गतिविधि नरोके बेरुतमाथि अझ कडा आक्रमण हुन सक्ने चेतावनी इजरायलले दिएको जनाएको छ।
ट्रम्पको दबाबपछि पनि लेबनानमा इजरायली आक्रमण जारी, मानवीय संकट गहिरिँदै
अमेरिकी राष्ट्रपति डोनाल्ड ट्रम्पले आक्रमण रोक्न दबाब दिए पनि इजरायलले दक्षिणी लेबनानमा आफ्नो सैन्य कारबाही जारी राखेको छ। इजरायली प्रधानमन्त्री बेन्जामिन नेतान्याहूले दक्षिणी लेबनानमा तय गरिएको अभियान रोकिने कुनै सम्भावना नरहेको स्पष्ट पारेका छन्। हिजबुल्लाहले भने यसबारे तत्काल सार्वजनिक प्रतिक्रिया दिएको छैन।
लेबनान र इजरायलबीच तनाव कम गर्ने उद्देश्यले वासिङ्टनमा वार्ताको तयारी भइरहेका बेला पनि इजरायली आक्रमण र घुसपैठ रोकिएको छैन। मंगलबार दक्षिणी बेरुतबाट ठूलो संख्यामा सर्वसाधारण सुरक्षित स्थानतर्फ पलायन गर्दा सडकहरू घण्टौँसम्म जाम भएका थिए। स्थानीय बासिन्दाहरूले निरन्तर बमबारीका कारण घर छाड्न बाध्य भएको बताएका छन्।
इजरायलले पछिल्लो समय लेबनानमा गरेको सैन्य कारबाहीलाई पछिल्लो २६ वर्षयताकै सबैभन्दा ठूलो घुसपैठका रूपमा हेरिएको छ। यस क्रममा करिब १२ लाख मानिस विस्थापित भएका छन् भने ३,३०० भन्दा बढीले ज्यान गुमाइसकेका छन्। आइतबार इजरायली सेनाले रणनीतिक महत्वको ब्युफोर्ट क्यासल कब्जा गरेपछि क्षेत्रीय तनाव अझ बढेको छ।
विश्व खाद्य कार्यक्रम (WFP) र संयुक्त राष्ट्रसंघले लेबनानमा मानवीय संकट गम्भीर बन्दै गएको चेतावनी दिएका छन्। संयुक्त राष्ट्रसंघका महासचिव एन्टोनियो गुटेरेसका प्रवक्ता स्टेफाने डुजार्रिकले दक्षिणी लेबनानमा बढ्दो सैन्य गतिविधिप्रति चिन्ता व्यक्त गर्दै सबै पक्षलाई युद्ध विस्तार हुन नदिन आग्रह गरेका छन्।
फ्रान्सका राष्ट्रपति इम्मानुएल म्याक्रोँले दक्षिणी लेबनानमा भइरहेको हिंसाको कुनै औचित्य नभएको बताउँदै तत्काल युद्ध अन्त्य गर्न माग गरेका छन्। बेलायत, जर्मनी र साउदी अरेबियाले पनि इजरायली कारबाहीको आलोचना गर्दै अन्तर्राष्ट्रिय समुदायलाई हस्तक्षेप गर्न आह्वान गरेका छन्।
यसैबीच इरानले लेबनानमाथिको आक्रमण जारी रहे अमेरिकासँगको वार्ता प्रभावित हुन सक्ने चेतावनी दिएको छ। इरानी संसद्का सभामुख मोहम्मद बाकर गालिबाफले आवश्यक परे इजरायलविरुद्ध जवाफी कदम चालिने बताएका छन्। इरानी प्रतिनिधिमण्डलले अमेरिकासँग तय भएको उच्चस्तरीय भेटसमेत बहिष्कार गरेको समाचार सार्वजनिक भएका छन्।
अमेरिकी सञ्चारमाध्यमका अनुसार इरानसँगको शान्ति प्रक्रियामा असर पर्ने संकेत देखिएपछि ट्रम्पले नेतान्याहूसँग कडा टेलिफोन वार्ता गरेका थिए। सो क्रममा उनले लेबनानमाथिको निरन्तर आक्रमणले क्षेत्रीय स्थायित्व र कूटनीतिक प्रयासलाई कमजोर बनाएको बताएका थिए। यद्यपि ट्रम्पको दबाबका बाबजुद इजरायलले आफ्नो सैन्य अभियान जारी राखेको छ।
अमेरिकाको मध्यस्थतामा अप्रिल १६ देखि लागू गरिएको युद्धविराम प्रभावकारी बन्न नसक्दा क्षेत्रीय तनाव अझै कायम रहेको छ। दुवै पक्षले एकअर्कामाथि युद्धविराम उल्लंघन गरेको आरोप लगाइरहेका छन् भने अन्तर्राष्ट्रिय समुदायले तत्काल वार्ता र शान्तिपूर्ण समाधान खोज्न आग्रह गरिरहेको छ।
